Марий кугыжаныш университет пеленысе «Воскресение» студент-влакын кычалше отрядше Ленинград областьысе Киров район Гайтолово ял кундемыш каен. «Волховский фронт -2021» экспедицийыште Российын 13 регионжо гыч ӱдыр-рвезе-влак погыненыт.
Ты кычалме паша гыч увер дене «Воскресение» студент-влакын кычалше отрядын командиржын алмаштышыже Николай Сергеев палдарыш:
– Марий Эл гыч тышке ме машина дене 24 шагат жапыште толын шуынна. Вара лагерьым вераҥденна. Эн ончыч кугу палаткым шогалтышна, чыла ӱзгарым тушко оптышна. Вара тентым вераҥдышна, кочмо верым келыштаренна.
Мый разведке группышто улам. Тыштак мемнан отряд командирна Пётр Бусыгин, Юрий Иванов, Евгений Шалагин улыт. Таче кечылан немыч котелок-влакым муынна. Тушто немыч салтак шке лӱмжым возен. Тыгай ятыр патрон, гильзе, военный снаряжений ужаш-влакым муынна.
Ты кундемыште Кугу Отечественный сар годым моткоч кугу кредалмаш каен. Тиде верыште кредалаш чот йӧсӧ лийын, йырваш куп, ночко вер. Совет салтак-влак, Ленинград блокадым шалаташ манын, кум гана прорывыш пураш толашеныт. Шуко гана местный операций лийын. Эсогыл немыч салтак-влакын возен кодымо шарнымашышт уло. Нунын армийыштат тыште шуко еҥым йомдарен манын палемденыт.
Сар деч ончыч тыште 61 пӧрт лийын. Кызыт Гайтлово ял пытен. Но сарын кышажым алят ужаш лиеш. Ме ты верыш арам огыл кычалаш толынна. Тышке Марий АССР гыч ятыр салтакым кредалаш колтеныт.
Алена Яковлева